মহাশয়,
বন্দুকৰ গুলীলৈ ভয় কৰিলেও আপোনাক আৰু আপোনাৰ সতীর্থবৃন্দলৈ এই পত্র লিখাৰ প্রয়োজনবোধ কৰিছঁ। উত্তৰ দিলে খোকোজা দুৰ কৰিব পাৰিম বুলিহে পত্র লিখিছো। গতিকে খং-ৰাগ নকৰি উত্তৰ দিলে এই অধমে কৃতার্থ হম.........।
১। আপোনালোকে বিচাৰি থকা স্বাধীন অসমত থাকিবলৈ যোগ্যতা কাৰ হব? কোনে পাব? আপোনাৰ দৃষ্টিত অসমীয়া কোন?
২। আপুনি স্বাধীন অসম বিচাৰিছে ভাল কথা। কিন্তু তাৰ বাবে নিৰীহৰ বলি কিয়? আপোনাৰ স্বাধীনতাৰ আন্দোলনত মোৰদৰে কিছুমানৰ সন্মতি নাই। গতিকে আপোনাৰ স্বাধীনতাৰ যুদ্ধৰ নামত আমাৰ স্বাধীনতা কাঢ়ি নিয়াৰ অধিকাৰ কোনে দিলে আপোনাক?
৩। আপুনি আজি DY365 ত কলে যে বিহাৰী মাৰোৱাৰীয়ে অসমত থাকিলে বৰঙণি দিয়াটো বাধ্যতামূলক। পিচে একেই চর্ত যদি অসমৰ বাহিৰত কর্মৰত অসমীয়াৰ বাবে প্রযোজ্য হয় তেতিয়া আপুনি আহিবনে আমাক উদ্ধাৰ কৰিবলৈ? বিহাৰী মাৰোৱাৰীক আপুনি অসমীয়াৰ বাবে মাত মতাৰ দৰকাৰ নাই বুলি কলে যদিও জ্যৌতিপ্রসাদ আগৰৱালা, চন্দ্রকুমাৰ আগৰৱালা আদিবোৰৰ অবদানৰ কথা কিদৰে অস্বীকাৰ কৰিব?
৪। আপুনি বাংলাদেশী বিতাৰণৰ ক্ষেত্রত নিমাত কিয়? আজিলৈকে এটা শব্দ কোৱা শুনিবলৈ পোৱা নাই এইটো বিষয়ত। আপোনাৰ দৃষ্টিত বৃহত্তৰ স্বাধীন অসম(?)ৰ অবিচ্ছেদ্য অংগ নেকি তেওলোক? নে কেবল আশ্রয়দাতা বাবেই এই আওকণীয়া মনোভাব কিম্বা এৰা-ধৰা?
৫। ১৯৯৯ চনত কাশ্মীৰৰ কার্গিল যুদ্ধত যেতিয়া অসমীয়া জোৱান ছহিদ হৈছিল আৰু নিথৰ শৱদেহ হৈ ঘুৰি আহিছিল সেই সময়ত আপুনি পাকিস্তানক সমর্থন দিছিল ঔপনিবেশিকতাৰ বিৰুদ্ধে মুক্তি যুদ্ধ আখ্যা দি। অথচ, এজনো অসমীয়া জোৱানৰ প্রতি আপোনাৰ এটোপাল চকুলো নোলাল। আপুনি কাৰ বাবে স্বাধীন হব খুজিছে?
৬। হাজাৰ ভাবুকি দিলেও ধেমাজীৰ কণ-কণ লৰা-ছোৱালী কেইটিৰ মৃত্যু আপোনালোকৰ স্বাধীনতা সংগ্রামৰ এটি কলংকিত অধ্যায় নহয় জানো?
৭। নগা, অৰুণাচলীয়ে অসমীয়া মাৰিলে আপুনি নিতাল মাৰে কিয়? গড় হত্যাৰ বিৰুদ্ধে এষাৰ মাত জোৰকৈ মাতকচোন। নে সেইবোৰ আপোনাৰ বাবে বিচার্য্য বিষয় নহয়?
ডাঙৰীয়া, ভুল হলে আৰু কলে ক্ষমা কৰিব। খাটি অসমীয়া বুলি এবাৰলৈ মাফ কৰিব।তাতে আকৌ এটা সময়ত আপোনালোকৰ বহু সতীর্থক নিজে গোহালি ঘৰ, খেৰৰ পুঁজি আদিত থাকি হলেও বিচনা এৰি দি বৃদ্ধ পিতাই আর্মিৰ বহুত মাৰ খাই থৈছে। মাৰে বা কাটে, শুধিব মন গ’ল শুধিলো। পাৰিলে জাতিৰ হকে মাত মাতক, বিপ্লব আৰু বিপ্লবী নিজেই আগবাঢ়ি আহিব আপোনালোকৰ লগত।
>জয়তু জন্মভুমি
>
ইতিত
ঘনশ্যাম ডেকা, ভেংলুই, আইজলৰ পৰা।
No comments:
Post a Comment